Fréttabréf Grenivíkurskóla

9. tbl. 3. árg. - nóvember 2022

Kæra skólasamfélag

Þá er viðburðaríkum október lokið og framundan nýr mánuður og ný ævintýri. Meðal þess sem var á dagskrá í nýliðnum mánuði voru tónleikar hjá Tónlistarskóla Eyjafjarðar, leiksýningar, danssýning og Hrekkjavaka svo fátt eitt sé nefnt. Um þetta flest má ýmist lesa um eða skoða myndir af hér neðar í fréttabréfinu.


Nú er heldur betur orðið myrkvað á morgnana og tilefni til að minna aftur á mikilvægi endurskinsmerkja, þau auka mjög öryggi ungra vegfarenda á leið í skólann að morgni.


Í nóvember er heilmargt á dagskránni. Ég bendi sérstaklega á starfsdag þann 9. nóvember - en þá er frí hjá nemendum - og svo viðtalsdag þann 10. nóvember. Nánari upplýsingar og skráning í viðtöl kemur til ykkar í pósti fljótlega.


Með kveðju úr skólanum,

Þorgeir Rúnar Finnsson

skólastjóri Grenivíkurskóla

Góðan daginn, faggi

Í byrjun október fóru nemendur á unglingastigi fram í Laugarborg í Eyjafjarðarsveit þar sem þau fengu að sjá leikverkið Góðan daginn, faggi, en um er að ræða sjálfsævisögulegan heimildasöngleik sem fjallar um hinseginleikann, fordóma og mennskuna. Á nokkrum fyrri sýningum hafði borið á leiðinlegri og fordómafullri framkomu gesta í garð leikaranna, en ánægjulegt er að segja frá því að nemendur okkar - og aðrir sem voru á þessari sýningu - voru til mikillar fyrirmyndar og fengu hrós fyrir góða framkomu.


Lesa má meira um sýninguna hér.

Tónleikar TE

Miðvikudaginn 12. október var haldinn tónfundur hjá nemendum í Tónlistarskóla Eyjafjarðar í Græna salnum. Þessar stundir eru alltaf skemmtilegar og magnað hversu margt hæfileikafólk á sviði tónlistar er í nemendahópnum og öflugir kennarar hjá Tónlistarskólanum sem halda vel utan um starfið. Tengil á myndasafn frá tónleikunum má sjá neðar í fréttabréfinu.

Jól í skókassa

Líkt og undanfarin ár tóku nemendur og starfsfólk Grenivíkurskóla þátt í verkefninu Jól í skókassa. Um er að ræða alþjóðlegt verkefni sem felst í því að gleðja börn sem lifa við fátækt, sjúkdóma og erfiðleika með því að gefa þeim jólagjafir. Skókassarnir frá Íslandi fara til barna í Úkraínu og verður meðal annars dreift á munaðarleysingjaheimili, barnaspítala og til fólks sem býr við sára fátækt. Líkast til hefur þörfin fyrir hvers kyns aðstoð í Úkraínu aldrei verið meiri en um þessar mundir, í ljósi þess ömurlega stríðs sem þar geysar.


Að þessu sinni söfnuðust gjafir sem fylltu í 27 skókassa og þökkum við öllum þeim sem lögðu hönd á plóg kærlega fyrir sitt framlag.


Meira má lesa um verkefnið hér.

Valgreinar - fyrsta lota búin

Fyrstu lotu valgreina fyrir miðstig og unglingastig lauk um miðjan október. Boðið var upp á útivistar- og hjólaval, bakstur og skák á unglingastigi en leiklist, skák og skítamix fyrir miðstig. Í skítamixinu lærðu nemendur ýmislegt gagnlegt um rafvirkjun og fleira hagnýtt undir dyggri leiðsögn Stefáns Hrafns, húsvarðar.


Undir lok mánaðar byrjaði svo önnur lota en í henni fara nemendur á unglingastigi í skítamix og spilasmiðju, en nemendur á miðstigi fara í skólahreysti, spilasmiðju og pílukast hjá Birni Andra pílumeistara. Vafalaust skemmtilegir tímar fram undan!

Heilsueflandi skóli

Dagatal Velvirk fyrir þennan mánuð ber yfirskriftina "Nýjar leiðir í nóvember". Á dagatalinu má finna ýmsar tillögur sem eru í anda þess sem rannsóknir hafa sýnt að geti hjálpað fólki að lifa hamingjuríkara lífi svo sem að gefa af sér, tengjast öðrum, finna tilgang, leika sér og njóta augnabliksins.


Smellið hér til að sjá útprentanlegt pdf-skjal með dagatalinu.

Grænfáninn

Áfram höfum við haldið á síðustu samverustundum að fræðast um Heimsmarkmið Sameinuðu þjóðanna, en við höfum horft á fjóra þætti af HM30 og því fræðst um fjögur markmið af 17. Við munum halda áfram að horfa á þessa góðu þætti og ræða markmiðin og aldrei að vita nema unnið verði enn frekar með þau í formi verkefna hjá ákveðnum hópum. Fyrir sérlega áhugasama má nálgast þættina og frekari upplýsingar inni á þessari heimasíðu.

Á döfinni í nóvember

  • 2. nóvember: 9. og 10. bekkur fer í skólakynningar í MA og VMA.
  • 7. nóvember: List fyrir alla - 1.-4. bekkur fer á leiksýninguna "Sögur af draugnum Reyra" í Hofi á Akureyri.
  • 8. nóvember: Baráttudagur gegn einelti.
  • 9. nóvember: Starfsdagur - frí hjá nemendum.
  • 10. nóvember: Viðtalsdagur.
  • 14. nóvember: Skáld í skólum - rithöfundarnir Ævar Þór Benediktsson og Arndís Þórarinsdóttir koma í heimsókn
  • 16. nóvember: Dagur íslenskrar tungu - undirbúningur fyrir Stóru upplestrarkeppnina í 7. bekk hefst
  • 20. nóvember: Dagur mannréttinda barna
  • 23. nóvember: 1.-4. bekkur fer á leiksýninguna "Ævintýri á aðventunni" í Valsárskóla.
  • 24. nóvember: Samskóladagur fyrir unglingastig í Valsárskóla.

Grenivíkurskóli

Útgefandi: Grenivíkurskóli

Ábyrgðarmaður: Skólastjóri Grenivíkurskóla