Úthlutað hefur verið úr þróunar- og nýsköpunarsjóði. Í A-hluta barst alls 171 umsókn. Sjá nánar á myndum hér fyrir neðan og á infogram.com. Alls bárust 40 umsóknir í B-hluta. Lokið var við yfirferð þeirra umsókna um mánaðarmótin maí/júní. Gerð var krafa um fjölbreytt samstarf og að verkefni tengist rannsóknum eða samstarfi við fræðasamfélagið.Sjá nánar um úthlutanir úr B-hluta.

Upplýsingasvæði um menntastefnuna er að finna á vef Reykjavíkurborgar en unnið er að gerð sérstakrar vefsíðu um menntastefnuna þar sem hægt verður að nálgast stefnuna sjálfa og allt mögulegt henni tengt, gátlista, verkfærakistur, leiðbeiningar og upplýsingar um námskeið og samstarfshugmyndir og margt fleira.

Menntastefnan er með sérstakt svæði á Workplace Menntastefna Reykjavíkurborgar – Látum draumana rætast og hefur starfsfólk skóla- og frístundasviðs verið hvatt til að gerast meðlimir til að fylgjast með framvindu mála. Á síðunni er að finna myndir frá öllum hverfafundunum og margt fleira sem tengist innleiðingarferlinu. Hafa starfsstaðir m.a. sett ýmislegt þarna inn um það sem þeir hafa verið að gera.

Gátlista fyrir starfsstaði sem byggja á grundvallarþáttum stefnunnar eru tilbúnir og hafa þeir verið sendir starfsstöðum sem tóku þeim fagnandi. Rafræn framsetning gátlistanna er í undirbúningi í samstarfi við Embætti landlæknis – heilsueflandi samfélag.

Verkfærakistur með hugmyndum og mælikvörðum fyrir hvern og einn grundvallarþátt eru í vinnslu. í verkfærakistunum verður hægt að nálgast fjölda hugmynda að verkefnum ásamt leiðbeiningum um hvernig hægt er að nýta tölulegar upplýsingar og önnur gögn til að mæla framfarir. Framsetning þessa efnis er í þróun og hangir saman við gerð vefsíðu fyrir menntastefnuna.

Menntastefnan hefur verið gefin út í prentuðu formi og geta starfsstaðir fengið send eintök til sín. Einnig er hægt að nálgast hana á vef Reykjavíkurborgar. Stefnan er einnig til á ensku bæði í prentuðu og rafrænu formi.

Til að hefja formlega innleiðingu stefnunnar var blásið til viðburðar i Borgarleikhúsinu þann 6. febrúar fyrir alla stjórnendur í skóla- og frístundastarfi borgarinnar. Þar leit stefnan í núverandi mynd fyrst dagsins ljós. Sjá upptöku frá fundinum hér fyrir neðan.

Í framhaldi viðburðarins var umræðunni fylgt eftir með hverfafundum í öllum borgarhlutum og voru alls haldnir 5 hverfafundir í febrúar. Öllum starfsstöðum var boðið að senda 2-3 fulltrúa á fundina auk þess sem fulltrúum frá skólateymum þjónustumiðstöðvanna var boðið. Á hverjum fundi voru um 50-80 manns og var hver fundur um 2 klst þar sem bæði var boðið upp á kynningar og samtal.

Hin árlega Barnamenningarhátíð var haldin í aprílmánuði en hún er samstarfsverkefni skóla- og frístundasviðs og menningar- og ferðamálasviðs. Yfirskrift lags hátíðarinnar „Draumar geta ræst“ er með beina skírskotun í yfirskrift menntastefnunnar „Látum draumana rætast“. Grunnurinn að laginu er verkefni þar sem allir nemendur í 4. bekk í grunnskólum Reykjavíkur fengu unga leikara í heimsókn þar sem þeir fylgdust með stuttum leikþætti byggðum á menntastefnunni. Leikþátturinn var um það hvernig við látum drauma okkar rætast og hvað við þurfum að gera til að þeir geti ræst. Að því loknu ræddu börnin saman og voru þrjár spurningar lagðar fram til grundvallar: · Hverjir eru mínir draumar? · Hverjir eru draumar mínir fyrir aðra? · Hverjir eru mínir draumar fyrir heiminn?
Draumar barnanna voru svo skrifaðir niður og sendir til lagasmiðsins Jóns Jónssonar og textasmiðsins Braga Valdimars Skúlasonar. Þeir unnu lag og texta fyrir Barnamenningarhátíð, en lagið „Draumar geta ræst“ fjallar þannig um drauma barnanna í borginni og var það frumflutt við setningu Barnamenningarhátíðar í Eldborg í Hörpu 9. apríl 2019 en öllum nemendum (um 1600 talsins) í 4. bekkjum grunnskóla Reykjavíkur ásamt kennurum var boðið á opnunarviðburðinn. Þess má geta að lagið hefur ná víðtækum vinsældum í samfélaginu og var það t.d. komið í 8. sæti á vinsældarlista Rásar 2 í lok apríl og kosið af börnum "texti ársins" á verðlaunahátíðinni Sögur (sjá frá 23. mín.).

Útbúinn hefur verið pakki með leiðbeiningum um undirskrift í tölvupósta þar sem hægt er að setja inn lógó tengt menntastefnunni. Getur hver og einn starfsmaður valið sér menntastefnu-lógó til að hafa með í sjálfvirkri undirskrift í tölvupósti sínum. Sjá sýnishorn af lógóum og leiðbeiningar í PDF skjali hér fyrir neðan.