Pānui o te wiki

Wiki 3, Wāhanga 4

Te Aho Matua

Te Ira Tangata

1.1 Nō ngā Rangi Tuhāhā te wairua o te tangata. I tōna whakairatanga ka hono te wairua me te tinana o te tangata. I tērā wā tonu ka tau tōna mauri, tōna tapu, tōna wehi, tōna iho matua, tōna mana, tōna ihi, tōna whatumanawa, tōna hinengaro, tōna auahatanga, tona ngakau, tona pumanawa. Na ka tupu ngatahi te wairua me te tinana i roto i te kopu o te whaea, whānau noa.

Te Rangaihi 2022

Taku whakaruruhau, taku ahi tutata, he kainga rua mō te iwi e, rukuhia taku whare e!


Kei te karamata o te mahi a te rēhia a tātou tamariki, i tū kaha, i tū māia kia whakapauwerawera ki te papatūwaewae o Te Rangaihi. Ka rere ngā mihi ki a rātou katoa.


Ki a tātou Kaimahi i ārahi i tēnei rōpū, whakatakoto o koutou poi, o koutou rākau kia tau i tēnei wā, ā, ka rite anō ki te hiki i te mānuka a tērā tau ki Te Mana Kuratahi! Kore e mimiti ngā mihi ki a koutou.


Ko Te Whānau Tahi a tātou ingoa, ko te mahi tahi a tēnei whānau te tikanga! Ka rere ngā mihi ki a koutou mā e kaha tautoko i te kaupapa i te wikene, koutou mā i manaaki i ngā kuia me ngā koroua, koutou i tū hei tūtei, koutou i tiaki i ngā tāngata o te hāpori, tēnā koutou!

Te Kapahaka o Te Kura Kaupapa Māori o Te Whānau Tahi

Tūranga Tuarua o Te Ranga Ihi 2022


I pōhiritia e te kura ēnei tāonga ki tō tātou āhuru mōwai a Te Atawhai o Te Aotūroa.

Mōkori anō te rere o ngā mihi ki te whānau whānui, ōtira ki ngā manu taiko, ki ngā manu tioriori i rere ki te karamatamata o Te Rangaihi. Iti rearea Kahikatea ka taea.

Big picture



TE KĀKANO KI TE RANGAIHI 2022


Kia kawea tātou e te rēhia, inā te ataahua o ngā kapa haka o Waitaha i te Hatarei kua pahure nei.

Te pīwari hoki o ngā teina o te kura i kawe i ngā mahi ā Tanerore, ā Hine Rēhia ki te papatūwaewae.

I rere te hikaka, te wehi me te harikoa ki te marea.


Koia nei ētahi o ngā whakaaro o ngā ākonga.


I te mataku au ki te mahi kapa haka. Kāore au i te pirangi, engari he tino rawe. He tino rawe Te Rangaihi me te kapa haka inaianei." Ayanna Pimm Tau 2


“ I kaha te tū o te kapa!” Matthew Mikaere Smart Tau 1


“ Nanakia taku haka” Akuhata Dann Tau 1


“ He pai ki au te haka ki te Rangaihi” Paris Whiley Tau 1


He mihi nui ki ngā whānau i tae mai ki te tautoko i te kaupapa nei. Mei kore ake ko koutou.

Big picture
Big picture

Ki a kōrua hoki ngā kaipāoho o te rā, kua rangatira ake te kaupapa i a kōrua mahi!

Big picture

Tamariki Mīharo - Wiki 3

E mihi ana ki a koutou ko whakatinana ngā uara o te kura i tēnei wiki!

Kura Tuatahi

Wiki Pukapuka

‘…mā te whakapono ia ki a ia anō te mauri o te moana e ora ai’.

Te Mauri, Kēri J.K Pēwhairangai- Charlie


“It matters not what someone is born, but what they grow to be.”

Harry Potter and the Goblet of Fire, J.K. Rowling


Ko te Wiki Pukapuka ā tērā wiki! Whakanuia! Hei taua wiki ka aro te Kura Tuatahi ki ngā pukapuka. Ka whakarākei mātou ngā tatau o ngā akomanga, ka pānui hoki mātou ngā pukapuka rawe ki ngā ākonga. Hei te Taite ka mau ngā tāngata katoa ngā kākahu o tō rātou tino kiripuaki. Ka tū hoki he kanikani hei taua ahiahi.

Big picture

Poitūkohu Tau 1 - 4

Big picture

Pā Whutupōro Tau 1 - 4

Big picture

Tau 5-8 Whakataetae Kiwi Tag

Big picture
Big picture

Wharekura

Te Wharekura ki Ngā Kuki Airani

Īnā te pai o te haerenga ki ngā Kuki Airani. I whai mātou ngā tuakana tau 12, tau 13 i te au o Takitumu waka ki te kāinga o mua o te Māori, ki Rarotonga. I reira mātou i pāinaina i te rā, i kauhoe ki ngā hāpua wai pūataata, i kai i ngā huarākau e puta ai a pito. Heoi anō, ehara tēnei i te hararei mō te hararei noa, i whakarite ngā kaiako i ngā ara maha ki te hono atu ki te ahurea o reira. I tino kite mātou i ngā rerekētanga me ngā ritenga o te Māori Kuki Airani me te Māori nō Aotearoa.


I te rā tuatoru i peka atu tō mātou tira ki tētahi wharewhakairo, i reira te tino tōhunga whakairo vaka o Rarotonga. I tino kite mātou i te ritenga tuatahi ki ō mātou tuakana i reira. Pērā i te hanga waka ki Aotearoa nei, i tīpakona tētahi rākau whānui kia hao i te wāhanga o roto. Mā tēnei ka puta ngā vaka i whakamahi ai ō tātou tīpuna.


I te rā whai muri i hāere mātou ki Tumutoa, ki te hanga umukai. I whakamārama mai rāua ko tōna wahine, ko te umukai tō rātou hāngi. Ko te tino rerekētanga, ka noho tō rātou hāpi kei runga i te papa. E ai ki ngā kōrero, ko te take e noho ana tō tātou hāpi kei rō papa, nā te makariri o Aotearoa nei. Kāore tēnei i te raru ki Rarotonga nō reira ka whakawerahia ngā kai ki runga i te papa. I te mutunga iho kua nanea a tia i ngā mīti, i ngā ika, i ngā tini huarākau i kaingia.


I tētahi pō i hāere mātou ki te Edgewater Resort mō te kai tina. I ora mārika a tamaroto, ā, i tīmata te whakaaturanga o ngā kanikani Kuki Airani. I whakaari mai rātou i ngā momo kanikani me ngā momo kākāhu rerekē nō ia moutere. Inā te kaha o ngā tama, te waiwaiā hoki o ngā kōtiro. Me te tere hoki o ngā kaitaramu! I rawe ki te katoa te mātaki i te whakaaturanga nei me te kite i te ahurea o ia o ngā moutere.


I tētahi rā, i hāere mātou ki te Kōrero o te ‘Ōrau, tētahi tōpūtanga e whakarauora ana i ngā tikanga o Rarotonga, i reira mātou i tūtaki atu ki a Sunshine. He mātanga ia ki te raranga, ā, i hanga mātou katoa i tētahi pōtae i ngā rau o te niu. I rawe te kite i te ōrite o te raranga ki rarotonga me te raranga ki Aotearoa. Ahakoa kāore i taea te whakahoki i ngā pōtae ki Aotearoa, he wheako mīharo tēnei mō mātou katoa.


Kua kore ngā mihi e mimiti ki te poari me ngā kaiako nā tō koutou whakarite i tēnei haerenga mō mātou. Ka mau tonu mātou i ēnei wheako mō ake tonu atu.


Nā Te Manaaki Karasulas

Big picture

Whakataetae Poirewa ā-rohe - Ngā Teina o te Wharekura

Tēnei te tira hou, tēnei haramai nei! Ko te rangi tuatahi o te whakataetae i tēnei rā, e tākaro kaha ana ngā tauira, he māia, he harikoa anō hoki!



Kēmu Hatarei ki Pioneer


10.15 v Cashmere A

4.30 v Burnside B



Nau mai tautoko mai!

Big picture

Tau 13 Koiri

I tēnei wiki i haere te akomanga Tau 13 Koiri ki Escape Artists hei whakakapi i te tau whakamutunga mō ēnei Amorangi. E rua ngā roopu whakataetae, ko ngā wāhine, ko ngā tāne. Ko te toa, ko te roopu tuatahi ki te pahiko i te ruma. Nā wai i whai angitū? Ko te tira wāhine!!

Mokori anō kia mihia rātou katoa i tā rātou eke panuku i te kaupapa Koiri i ngā tau kua pahure me te manako ia ka kawe atu ngā akoranga katoa hei whakapai ake i tā rātou noho i te ao, i tā rātou noho hei tangata.


Te Huinga Reo 2023

Ko whakatairanga te kaupapa whakamīharo nei! Hei te 12-16 o Maehe 2023 ka tau atu ngā Tau 12 me ngā Tau 13 o ngā KKM o Te Motu ki Heretaunga. He Kura Reo kei te haere!
Big picture
Big picture

Rāngi Whakahirahira


4 November - Last Day Kura Tau 11-13

7 November - NCEA Exams Start

9 November - Hui ā-whānau 5pm

1 December - Pō Whakamana Tamariki

11-16 December - Wiki Hā ki Taranaki

Pānui ā-Hāpori

Poipoiā Pūmanawa Inc. Society - Annual General Meeting 2022

Poipoiā Pūmanawa is a community incorporated society that aims to not only build connections with whānau members of our hāpori but also to connect our whānau to their Reo Māori. We have a range for kaupapa coming up in this AGM.


We have had a quiet but busy year securing funding for our 2023 Wānanga Reo, and we are hoping to have new whānau come on board with us. Nau mai haere mai ki te hui.


As we prepare for our Wānanga Reo in 2023 we would love it if whānau could complete this survey for Te Mātāwai. This will help us gauge where we can help your whānau on your reo journey, for all levels of fluency.


ANNUAL GENERAL MEETING

Wednesday 9th November

6.00pm - 7.00 pm

Te Atawhai o Te Aoturoa


New members welcome

Big picture
Big picture