168 PROMOCIÓN 2ºBAC

DISCURSO DIRECTOR. IES SANCHEZ CANTON PONTEVEDRA 2012-13


IES SÁNCHEZ CANTÓN
CENTRO DE ENSINO PÚBLICO
PONTEVEDRA


Señora Directora do Centro Galego de Tecnificación Deportiva

Sres. Compañeiros do E. directivo.(Secretaria, Vicedirector, Xefe de estudos)

Sra. Presidenta da ANPA

Señores titores

Señores Profesores

Estimados pais, nais, familiares e amigos

Benqueridos alumnos e alumnas de segundo de bacharelato

Señoras e Señores:

Boa tarde, en nome do equipo directivo do Ies “ Sánchez Cantón” de Pontevedra … doulles a benvida a esta graduación da cento sesenta e oito promoción do 2º curso de bacharelato.

Alumnado de segundo, sodes os protagonistas deste acto. Como director do Sánchez Cantón é un orgullo e unha satisfacción acompañarvos no día da vosa graduación … parece que foi onte canto entrastes en primeiro da ESO sendo uns nenos e agora saídes sendo xa mozas e mozos … persoas maiores adultas, homes con chaqueta e gravata, mulleres vestidas de señora. Fóronvos seis anos moi ben aproveitados.



Podo dicirvos no nome do claustro de profesores e de todo o persoal que coida de que o centro funcione, que hoxe temos a grata sensación do deber cumprido ... Véndovos agora aquí tan maiores e serios pensamos que o noso traballo aínda paga a pena, que traballar na ensinanza pública é un valor engadido. Todos intentamos axudarvos e ensinarvos o mellor que sabíamos, a vosa actitude e o voso esforzo puxeron o resto ... Nestes seis anos aprendestes moitos contidos, pero tamén moitos valores e actitudes: … o respecto polos demais, polos que non son ou non pensan coma vós…, polas normas que nos permiten convivir en igualdade de deberes e dereitos. Ogallá todo isto vos sirva no futuro universitario ou laboral para serdes boas persoas e bos cidadáns.

Vós sodes a esperanza do país, o futuro, non vai haber crise que se vos resista porque seredes xente ben formada, ilusionada e con ganas de comer o mundo … Vivimos tempos moi duros, … espero que vos souberamos inculcar que o traballo, o esforzo, a creatividade e a ilusión son imprescindibles hoxe para atopar traballo… A nosa tarefa formativa rematou, pero non a vosa, sexa na Universidade ou sexa nos Ciclos Formativos, seguídevos formando ata conseguir un título oficial. Aquí, en Madrid ou en Berlín cómpre estar ben formados para optar a un traballo digno. Seguro que vós xa teredes a sorte de ver a crise vencida. E mentres, a loitar.

Quero agradecerlles especialmente aos vosos pais (…e tamén avós e irmáns) a súa colaboración na vosa formación. Hoxe están aquí que lles cae a baba véndovos tan guapiñas unhas e elegantes outros … pero antes viñeron moitas veces para saber dos vosos estudos, xustificar as vosas faltas … porque tiñan moi claro que a vosa formación era cousa deles e nosa. Seguro que algunha vez eles vos tiveron que rifar ou chamar a atención na casa, …coma os directivos e os profesores o faciamos no Sánchez Cantón, …pero xa sabedes que era polo voso ben, polo que teremos ben seguro a vosa comprensión.

Tivestes moitas actividades extraescolares tivestes moitas actividades formativas, talleres, saídas, Semana branca, Italia, Madrid etc … As letras galegas, concursos literarios de lengua y literatura española… actividades da biblioteca, exames DELF, deportes, etc. … Estou seguro de que todas estas actividades complementarias …(nas que tamén debemos resaltar a axuda dos vosos pais e dos profesores que vos acompañaron) … contribuíron á vosa formación

Desexo agradecer e felicitar a todo o profesorado, ós que vos deron clase e sobre todo ós que se xubilaron ou xubilan este ano en concreto , Dª Lidia Méndez. Dº Eduardo Castro Peralta, Dª José Manuel Pensado, Dº Casimiro Mesejo González, Dona Mercedes Pita Rasilla e Dº Rafael Sánchez-Agustino Rodríguez é a Dona Marián Costa Giráldez…… ¡Grazas! por todo o empeño que puxeron na vosa formación … e non podo esquecerme de mencionar os meus compañeiros do equipo directivo:… a secretaria Dona Ana Martínez, os Xefes de estudos, Don José Lijó Parada e Don Antonio Rey Sorribas, o Vicedirector don Francisco Pérez Carral. Os meus agradecementos ao traballo levado a cabo pola orientadora Dª. Carmen Tallón… ademais, como non, á directiva da ANPA "O Verxel" representada aquí polo seu presidente Dº Luís Araujo Gómez,é o secretario Dº José Fernández López. A todo o persoal da secretaría, da conserxería, da limpeza e, por suposto do bar,… pola axuda que vos prestaron todos estes anos. Agradecemos especialmente a presenza de Dona Elena Fernández Rodríguez acompañando neste acto ó seu alumnado de 2º de bacharelato do Centro Galego de Tecnificación Deportiva, extensión académica do IES Sánchez Cantón.


E teño que ir xa rematando porque esta noite vai ser moi longa, verdade? … Así que … Ás vosas familias … dígolles que hoxe poden presumir e sentirse orgullosas de vós.

E vós,… alumnas e alumnos, espero que sempre gardedes nos vosos corazóns unha boa lembranza deste instituto público e vos sintades orgullosos de terdes estudado no IES Sánchez Cantón, que o poñades no voso perfil do Facebook e do twitter.

A todos vós o meu máis profundo agradecemento.

Moitas grazas e moita sorte para todos.

Graciñas