Fréttabréf Hvassaleitisskóla
Desember 2022
Aðventuhátíð Hvassó 2022
Hin árlega Aðventuhátíð Hvassaleitisskóla fór fram dagana 5. og 6. desember. Að vanda heimsóttu nemendur átta mismunandi stöðvar. Í ár var hægt að spreyta sig á því að poppa popp við opinn eld, búa til kerti, mála jólakúlur, hlusta á jólasögu með kakó og smákökum, auk þess sem boðið var upp á skemmtilega leiki í mildu og góðu aðventuveðri.
Hér fyrir neðan er tengill á myndband frá hátíðinni sem heppnaðist einstaklega vel.
https://youtu.be/k86qXhmf2xo
Jólasöngstund á sal
Á fimmtudögum í vetur hafa nemendur í 1.-4. bekk komið inn í íþróttasal til að syngja og dansa. Valin eru þrjú lög til að syngja á hverjum fimmtudegi og svo er dansað við nokkur lög úr Just dance. Það er dásamlegt að heyra nemendur syngja falleg íslensk lög og aðal stuðið er síðan þegar allir standa upp og dansa. Í jólamánuðinum voru jólalögin að sjálfsögðu í aðalhlutverki og meðfylgjandi eru myndir frá jólasöngstundum í desember.
Teiknisamkeppni 4. bekkinga
Eins og undanfarin ár tekur 4. bekkur þátt í teiknisamkeppni Mjólkursamsölunnar með leiðsögn frá Ella myndlistarkennara. Myndefni nemenda er frjálst en má þó gjarnan tengjast mjólk og íslensku sveitinni eða hollustu og heilbrigði en umfram allt eiga nemendur að gefa ímyndunaraflinu og sköpunargáfunni lausan tauminn. Hér eru þrjú sýnishorn af verkum nemenda þetta árið.
Matisse og Mondrian
1.bekkur vinnur m.a. verk í anda franska málarans Henri Matisse í myndmennt og hér eru tvær myndir frá því í vetur. Meðal þess sem 6. bekkur hefur verið að fást við á þessu skólaári eru abstrakt myndir í anda hollenska listamannsins Piet Mondrian og meðfylgjandi eru þrjú sýnishorn frá þeirri vinnu.
Einn dáðasti tengdasonur Hvassaleitisskóla, landsliðsmarkvörðurinn og rithöfundurinn Björgvin Páll Gústavsson, kom í heimsókn. Hann las fyrir nemendur upp úr nýju bókinni sinni, Barn verður forseti, en konan hans, Karen Einarsdóttir, er námsráðgjafi hjá okkur í skólanum. Bókin er heiðarleg og ljúfsár saga um von, metnað, kærleika og mikilvægi þess að gefast aldrei upp þótt allt virðist glatað. Það eru alltaf ný tækifæri í næsta leik.
https://youtu.be/Tk4bn6GdoPQ
Jólaföndur foreldrafélagsins
Jólaföndur foreldrafélagsins var haldið á fullveldisdeginum, 1. desember, eftir tveggja ára hlé. Föndrið var vel sótt og var sérstaklega gaman að sjá krakkana koma með fjölskyldunum sínum, þar sem allir voru í jólaskapi. Foreldrafélagið var með föndur sem var selt á kostnaðarverði og 6. bekkur seldi vöfflur og kakó í fjáröflunarskyni. Föndrið tókst afar vel og verður pottþétt árlegur viðburður.
2. bekkur hefur haft mikið fyrir stafni síðustu vikur, þar sem Aðventuhátíðin stóð auðvitað hæst og við skemmtum okkur konunglega. En við höfum gert ýmislegt annað, fórum m.a. í umhverfisleiðangur og tíndum upp rusl í nærumhverfinu okkar. Þá fórum við í mjög skemmtilega vasaljósagöngu í hverfinu og fengum heitt kakó og piparkökur. Við vorum líka svo heppin að fá inn til okkar stóra taflborðið sem skólinn á og það hefur sannarlega vakið mikla lukku. Í samfélagsfræði unnum við skemmtilegt verkefni um hreinlæti og gerðum öll (plat)ferðatöskur og límdum í þær alls konar hluti sem við teljum mikilvæga til að halda okkur hreinum á ferðalögum. Í stærðfræði æfðum við okkur í að mæla með reglustiku og það má eiginlega segja að við séum orðin algerir snillingar í að mæla. En nú erum við bara á fullu í alls konar jólajóla og markmiðið er að hafa það sem mest kósý og notalegt þessa síðustu daga fyrir jólafrí.
Jólin koma...
Desember er annasamur mánuður fyrir nemendur og starfsmenn Hvassaleitisskóla. Við byrjuðum á jólahöfuðfatadegi 1. desember. Aðventuhátíðin gekk ljómandi vel og margir voru duglegir við jólabókalesturinn.
3. bekkur fór í skemmtilega bíóferð í Bíó Paradís. 2. bekkur fór í kakó- og vasaljósaferðir um nágrennið í skammdeginu og 4. bekkur fór í badmintonferð í TBR húsið í Laugardal. 1. bekkur fór í heimsókn í Furugerði og 4. bekkur fylgir í kjölfarið eftir helgi. Framundan er líka Hallgrímskirkjuferð hjá 5. bekk, auk þess sem 7. bekkur sýnir jólaleikritið mánudaginn 19. desember og svo endar dagskráin fyrir jól með helgileik 4.bekkjar og jólaballi daginn eftir.
Allir í skólanum skreyttu jólakúlur á Aðventuhátíðinni. Kúlurnar verða settar í glugga skólans og eru gjöf frá nemendum til Hvassaleitisskóla. Við notum þær svo um komandi jól til að gera fallegt og jólalegt hjá okkur.
