Kæru foreldrar og forráðamenn nemenda í Setbergsskóla.

Nóg er að gera hjá okkur í Setbergsskóla og nýlega fengum við viðurkenningu frá embætti landlæknis um að vera heilsueflandi grunnskóli. Áhersluþættir verkefnisins eru: nemendur, mataræði/tannheilsa, lífsleikni, heimili, nærsamfélag, hreyfing/öryggi, geðrækt og starfsfólk.

Starfsfólk fékk fræðslu frá embættinu 2. janúar á fyrsta skipulagsdegi ársins 2023. Í kjölfarið unnum við í hópum þar sem starfsfólk rýndi í hvað gert er innan skólans nú þegar, tengt efninu, og hvar þarf að bæta í. Margar góðar hugmyndir komu fram, t.d. breytingar á frímínútum, nýta nærumhverfi meira, hvetja til aukinnar hreyfingar og fjölbreytts mataræðis. Teymið Heilsueflandi grunnskóli mun vinna úr gögnum frá hópunum og í kjölfarið verður fundað með fulltrúum nemenda og þeirra hugmyndir reifaðar. Þetta verkefni samþættar ýmislegt annað sem við vinnum að innan skólans, m.a. SMT-skólafærni, Olweusarverkefnið, ART og KVAN en allt eru þetta verkefni sem styðja við félagsfærni og bætta líðan nemenda.

Í þessum annál gefum við ykkur innsýn í það fjölbreytta og öfluga starf sem á sér stað innan skólans. Starfsmannahópurinn er einstaklega samstilltur og samhuga um að efla færni nemenda á öllum sviðum. Vel heppnað lestrarátak, Stóra upplestrarkeppnin, Vinaliðaverkefnið, tónleikar á sal í samstarfi við Tónlistarskólann og margt fleira hafa verið á döfinni upp á síðkastið að ógleymdum samtalsdegi sem veitir alltaf miklar upplýsingar um það sem vel er gert og það sem má bæta í skólastarfinu.

Um leið og við þökkum ykkur fyrir gott og uppbyggilegt samstarf það sem af er þessu skólaári viljum við óska ykkur öllum ánægjulegra daga í vetrarleyfinu. Við hlökkum til áframhaldandi samstarfs og hvetjum ykkur til að vera í sambandi við okkur eftir því sem þörf er á.

María Pálmadóttir, skólastjóri

Margrét Ólöf Jónsdóttir, aðstoðarskólastjóri

Foreldrafélagið gefur öllum nemendum Setbergsskóla glaðning á öskudag. Nokkrar stelpur í 7. bekk tóku að sér að setja í pokana og gera klárt fyrir öskudaginn. Við þökkum stjórn foreldrafélagsins fyrir gott samstarf og hlýhug. Þetta hittir beint í mark.

Flæðandi læsispopp

Nemendur og starfsfólk tóku virkan þátt í popplestrarsprettinum og flæddu lestrarpoppin um veggi og ganga. Nemendur og starfsfólk bar saman bækur sínar og deildu hugmyndum að skemmtilegu og fróðlegu lesefni.

Nemendur stóðu sig sérstaklega vel í þessu verkefni og hafa heimilin væntanlega orðið vör við lestraráhugann og hann smitaði heimilisfólk að lesa sér til ánægju og yndisauka. Það er hvati fyrir krakkana að eiga góðar lestrarfyrirmyndir því lestur eykur orðaforða, lesskilning og lesfimi. Eins og fram hefur komið þá er tilgangur með lestarátaki að ýta undir áhuga nemenda á lestri og bæta þá þætti sem hér hafa verið nefndir.

Áfram með smjörið

Með lestrarleik eins og popplestri er björninn ekki unninn því það er svo margt annað sem við gerum til að auka hæfni í lestri. Krefst það starf samvinnu heimilis og skóla. Lesum fyrir krakkana, hvetjum þau til að lesa, hlustum á þau, spyrjum út úr, leikum okkur með málið, skrifum sögur, færum í dagbækur, lærum og lesum ljóð og hvað annað sem okkur dettur í hug. Eitt er víst að við höldum áfram að lesa og hvetja okkar frábæru krakka til dáða.

Popplestarátakið vakti mikla hrifningu og nemendur og starfsfólk festu poppmiðana á vegginn fyrir framan bókasafnið. Poppmiðarnir voru í ólíkum litum eftir stigum, yngsta stig notaði fjólubláa poppmiða, miðstig græna, unglingastigið gula og starfsfólkið bleika.

Nemendur í unglingadeildinni í Bergi tóku að sér það skemmtilega verkefni að taka poppmiðana niður af veggnum við bókasafnið í lok lestarátaksins, flokka miðana og telja eftir litum. Loks voru niðurstöður settar upp í stigatöflu til að sjá hvaða hópur hafði lesið flestar mínútur í lestrarátakinu.

Fær talningahópurinn bestu þakkir fyrir velunnin störf.

Áheyrendur sýndu listafólkinu og sjálfum sér virðingu með því að hlusta af andugt og klappa fallega eftir hvert atriði.

Námsveggir rísa í skólastofum Setbergsskóla

Í vetur hafa kennarar komið upp námsveggjum í skólastofum. Námsveggir gegna mikilvægu hlutverki sem námsstoðir og er ætlað að stuðla að sjálfstæði nemenda.

Á námsveggjunum eru upplýsingar tengdar þeim viðfangsefnum sem unnið er að hverju sinni. Margir nemendur eru orðnir mjög leiknir í að nýta sér þessar bjargir.

Í yngri deildinni hefur verið áhersla á að þjálfa námsvini en í því felst að nemendur læra að ræða saman um námið og skipuleggja saman. Þannig auka þeir í sameining gæði náms.

Við marga námsveggi eru svokölluð fyrirmyndaverkefni en þau eiga að leiðbeina nemendum í ferlinu.

Vaxandi hugarfar er ein af meginstoðum leiðsagnarnáms. Í því felst að hafa trú á eigin getu, mistök eru leyfileg og mikilvægt er að nemendur temji sér seiglu og þrautseigju í námi.

S:\Leiðsagnarnám\Fyrirmyndaverkefni\5. bekkur\stærðfræði\form í rúmfræði 2.jpg