Fréttabréf Grænna skrefa

Fræðsla, nýjustu fréttir, viðbætur á heimasíðuna og fleira.

Big picture

Hvað er að frétta?

Grænu skrefin verða 10 ára nú í október og ætla af því tilefni að halda veislu í Tjarnarsal ráðhússins, þann 13. október nk. frá klukkan 14-16. Það verða spennandi erindi og skemmtilegt uppistand. Boðskortin eiga að hafa borist öllum starfsstöðum sem taka þátt í Grænum skrefum en við þurfum að fá svar sem fyrst til þess að geta áætlað fjölda gesta vegna veitinganna.


Þrír staðir hafa fengið viðurkenningu frá því að síðasta fréttabréf var sent út og eru myndir af því hér fyrir neðan. Nýir þátttakendur eru: Frístundaheimilin Sólbúar og Glaðheimar, Grasagarðurinn og Garðyrkju-verkbækistöðin í Laugardal, viðhald Fasteigna Klambratúni, frístundaheimilin Draumaland og Eldflaugin og félagsmiðstöðvarnar Frosti og 105. Við bjóðum þau velkomin í Grænu skrefin.

Sóun er hönnunargalli

Ég sá þessa fyrirsögn í blaði og hún kallaði strax á mig. Við erum auðvitað alltaf að gera okkar besta og draga úr sóun, vera umhverfisvæn og kaupa vörur í umhverfisvænum umbúðum. En við ráðum ekki við allt og sóunin hefur ýmsar birtingamyndir. Matvörum er gjarnan pakkað í marglaga umbúðir - tökum kex sem dæmi. Oft er 3 litum kexkökum pakkað saman í plast, og þeim er svo staflað í plastbakka með hólfum sem síðan er vafinn inn í ytri plast- eða pappaumbúðir.

Sumar umbúðir eru einnig algjörlega óflokkanlegar og ekki hægt að endurvinna. Það eru svokallaðar samsettar umbúðir þar sem pappi og plast eða ál er límt saman og engin leið að taka það í sundur.

En það er margt að gerast og nýsköpun í umbúðamálum er gríðarlega hröð. Umhverfisvænum umbúðum fjölgar og nú er einnig hægt að kaupa ýmisleg hreinsiefni og sjampó eða sápur í duftformi. Þá kaupir maður duftið ýmist í smáum pakkningum eða í áfyllingu í eigin brúsa og bætir síðan íslensku köldu vatni saman við. Með þessum hætti minnkar úrgangur til muna (oftast plast), við fækkum þeim umbúðum sem við hendum og við spörum einnig að flytja inn óþarfa vatn, sem við erum sjálf með nóg af. Einnig er hægt að kaupa hreinsiefni í töfluformi og setja töfluna út í vatn.


Þetta verður framtíðin og eins skrýtið og þetta hljómar núna þá verðum við orðin vön þessu innan skamms og þessi leið verður sú eðlilega. Það eru til margar lausnir nú þegar til að draga úr öllu umbúðamagninu svo að ef við rekumst á vörur sem er vafið inn í óþarflega stórar eða marglaga umbúðir þá verður það teljast rétt að sóun sé ákveðinn hönnunargalli.

FRÆÐSLA Í BOÐI

Kynningarglærur um Grænu skrefin til eigin afnota.

Ef þú vilt kynna Grænu skrefin betur fyrir starfsfólk og samstarfsfélaga þá er glærupakki á heimasíðu Grænna skrefa sem allir geta notað að vild. Sjá hér: https://graenskref.reykjavik.is/forsida/glaerur/

Fundur fyrir tengiliði Grænna skrefa

Allir þátttökustaðir í Grænu skrefunum geta sent einn eða fleiri tengiliði á fundinn, eða tengiliður / starfsmaður sem vinnur að Grænu skrefunum getur sjálfur skráð sig á fundinn. Fundurinn er ætlaður þátttakendum í Grænu skrefunum sem hafa komið innleiðingunni af stað og vilja spyrja spurninga eða spjalla við aðra í sömu sporum. Á fundinum segjum við reynslusögur, spyrjum spurninga og fáum svör og ráðleggingar.

Hvar: Fjarfundur á Webex. Skráning er nauðsynleg og tengill verður sendur á þá sem skrá sig hjá Grænum skrefum.

Næsti fundur verður: Fimmtudaginn 7. október kl. 15:00 - 16:00

Hvernig fræðslu vilt þú fá á þinn vinnustað?

Viltu fræðslu á þinn vinnustað um Grænu skrefin eða eitthvað því tengt?

  • Almenna kynningu á Grænu skrefunum (styttri eða lengri)?
  • Fræðslu um vistvæn innkaup?
  • Fræðslu um grænt bókhald?
  • Fræðslu um flokkun og úrgangsmál?
  • Eða eitthvað annað umhverfistengt sem þér dettur í hug?


Hugsaðu málið og sendu okkur línu á graenskref@reykjavik.is til að spyrja um fræðslumál.