Fréttabréf Engidalsskóla nóv 2021

Fréttabréf Engidalsskóla

Kæru foreldrar/forsjáraðilar.

Hér gefur að líta nóvember fréttabréf Engidalsskóla. Að þessu sinni eru mikið af myndum úr skólastarfinu og auðséð að það er alltaf líf og fjör í Engidalsskóla. Við erum en að vinna að innleiðingu á uppbyggingastefnunni (Uppeldi til ábyrgðar). Nú eru allir bekkir búnir að skilgreina hlutverkin og flestir að leggja lokahönd á bekkjarsáttmálana. Í þessu fréttabréfi kynnum við fyrir ykkur foreldrum skýru mörkin. Við erum ekki með eiginlegar skólareglur en fari nemendur yfir skilgreind skýr mörk er gripið inn í og nemendum er þá vísað til skólastjórnanda sem ákveður næstu skref. Foreldrar eru boðaðir til fundar með nemendum og áætlun gerð um það sem betur má fara. Mikilvægt er að allir séu meðvitaðir um þetta.

Engidalsskóli er símalaus skóli. Símar hafa ekki verið vandi í skólanum en nú þegar við erum komin með fullt miðstig kemur það fyrir að segja þarf nemendum að setja símana í töskuna. Við óskum eftir að þið ræðið þetta við börnin og að hugsanlega gæti komið til þess að við þurfum að taka símana af nemendum á skólatíma virði þau ekki tilmæli kennara.

Það eru alltaf einhverjar breytingar í starfsmannahópnum okkar og ljóst að svo verður aðeins áfram. Arna Ýr Kristinsdóttir lét af störfum 1. nóvember sem umsjónarkennari í 4. bekk og við hennar starfi tekur Eva Björk Harðardóttir. Þá mun Kolbrún Hauksdóttir umsjónarkennari í 1. bekk láta af störfum um áramótin en búið er að ráða í hennar stað Evu Hauksdóttir og hefur hún störf 1. desember. Í haust hefur hún Steinunn Sigmarsdóttir verið hjá okkur í forfallakennslu og verður áfram.

Við erum aðeins farin að hugsa til jólanna og byrjuð að skipuleggja heimsóknir í desember. Við leggjum áfram mikla áherslu á lestur, að nemendur hafi gaman að því að lesa og finni bækur sem höfði til þeirra. Þar hefur hún Guðný okkar á bókasafninu gert stórkostlega hluti í að leiðbeina nemendum. Guðný verður með bókakynningar á nýjum bókum fyrir alla nemendur og heimsóknirnar okkar í desember verða frá lesurum sem eru að gefa út bækur, bæði reyndum höfundum og höfundi sem er að stíga sín fyrstu skref.

19. nóvember kemur Bjarni Fritz og les fyrir nemendur í 3. - 7. bekk

22. nóvember kemur Smári Hannesson og kemur og les fyrir nemendur í 5.-7. bekk

Jólafrí nemenda hefst eftir jólaskemmtun 17. desember en nánar upplýsingar um dagskrána í desember kemur í næsta fréttabréfi.

Með bestu kveðju stjórnendur Engidalsskóla.

Áhugasvið

Frá því í haust hefur miðstigið í Engidalsskóla unnið með áhugasvið sitt einu sinni í viku tvær kennslustundir í senn. Margt hefur verið í boði og nemendur mjög áhugasamir um verkefnin. Hér að neðan má sjá bekk sem hannaður var og smíðaður af nokkrum nemendum.

Dótasögur

Hér má sjá nemendur í 2. bekk vinna skemmtilegt hópaverkefni. Hóparnir fengu poka með alls konar dóti og bjuggu síðan til sögu/ævintýri, teiknuðu sögusviðið á blað og að lokum flutti hver hópur sína sögu/ævintýri fyrir hina hópana. Með svona verkefnum er hægt að þjálfa marga þætti. s.s. ritun, tjáningu, framsögn og hlustun.

Heimsókn á Alþingi

Krakkarnir í 3.bekk fóru í heimsókn á Alþingi. Þar var margt spennandi að sjá. Fyrst fengu börnin fræðslu um aldur og sögu Alþingis. Í kjölfarið urðu skemmtilegar umræður um lýðræði. Nemendur gengu síðan á þingpalla þar sem þau fengu upplýsingar um hvernig þingið virkar. Nemendur voru spurðir hvort þau vildu verða þingmenn og það fóru ansi margar hendur á loft. Þegar þau voru spurð hvað þau myndu gera sem þingmenn þá svaraði einn nemandi að hann myndi láta flugvél fljúga yfir borgina á hverjum degi og láta rigna nammi. Í lok heimsóknar þá voru þau spurð hvað þeim fannst áhugaverðast og svörin voru að það væri alvöru gull í loftinu og einnig að það væri maður grafinn undir styttunni í Alþingisgarðinum.

Stærðfræði er skemmtileg

Nemendur í 5. bekk læra tölfræði m.a. með því að lesa úr súluritum, gera skoðankannanir og setja gögn upp í súlurit. Eins og sjá má á meðfylgjandi myndum nýta nemendur sér mismunandi aðstæður til að vinna sín verkefni. Nemendur eru almennt áhugasamir og gera ætíð sitt besta.

Hrekkjavaka 29. október

Nemendur og starfsmenn brugðu á leik og mættu í búningum.

Skreytingar voru á mörgum stöðum í skólanum.

Hér eru nokkrar myndir frá deginum.

Stundarfriður

Nemendur njóta sín vel í Stundarfriði og þar fer jafnframt fram mikilvægt nám. Myndirnar tala sínu máli en þar má sjá hvað nemendur eru hugmyndaríkir og skapandi. Ýmsar útfærslur af köngulóavef, köngulóm og draugum sem nemendur voru að gera í tilefni Hrekkjavöku. Einnig er hér videó sem sýnir úrval verkefna einn dag.

Gaman saman í Álfakoti

Þau eru mörg verkefnin sem nemendur leysa í Álfakoti. Segulkubbarnir eru mjög vinsælir og hægt að gera allskonar byggingar með þessum fínu kubbum.

Í tilefni af vinavikunni sem er að enda unnu nemendur í Álfakoti ýmis verkefni tengd vináttu, dúkkulísur og skilgreiningu á því hvað vinátta er eins og sjá má á stóru myndinni hér neðst. Virkileg flott vinna hjá nemendum.