Skólasafn Kelduskóla
NÝJAR BÆKUR - DESEMBER 2015
HÉR ER YFIRLIT YFIR NOKKRAR AF ÞEIM NÝJU BÓKUM SEM HAFA BÆST VIÐ SÖFNIN Í KORPU OG VÍK Í DESEMBER
Vísindabók Villa – Geimurinn og geimferðir
Við búum á pínulitlum hnetti í risa-, risa-, risastórum alheimi. Stjörnurnar á himninum og tunglið blasa við okkur og geimurinn sem er svo óendanlega spennandi fyrirbæri. En hvar byrjar og endar alheimurinn? Hvernig varð hann til? Hvað var áður en hann varð til? Hvað er að finna á reikistjörnum, tunglum og stjörnum í kringum okkur? Hvernig komumst við út í geim? Hvernig getum við lent á tunglinu? Hverjir fóru fyrst út í geim? Þessum spurningum og mörgum öðrum er leitast við að svara í þessari bók. Auk þess að bókin stútfull af tilraunum sem einfalt er að gera heima og tilvalið fyrir alla fjölskylduna að taka þátt í. Vísindabók Villa - geimurinn og geimferðir er þriðja bókin í þessari vinsælu seríu. Fyrri tvær slógu rækilega í gegn og var sú fyrsta tilnefnd til Íslensku bókmenntaverðlaunanna. Nú hefur Villi fengið Sólmyrkva-Sævar í lið með sér, Sævar Helgar Bragason, formann Stjörnuskoðunarfélags Seltjarnarness.
Þín eigin goðsaga
Sjálfstætt framhald verðlaunabókarinnar Þín eigin þjóðsaga. Þín eigin goðsaga er öðruvísi en aðrar bækur því hér ert þú söguhetjan og ræður ferðinni. Sögusviðið er heimur norrænu goðafræðinnar og ævintýrin eru við hvert fótmál. Þú getur lent í bardaga við hræðilegar ófreskjur, orðið vitni að upphafi heimsins, flogið í vagni með þrumuguðinum Þór og reynt að lifa af ragnarök – allt eftir því hvað þú velur. Yfir 50 ólíkir endar!
Ég elska máva
Anton verður furðu lostinn þegar hvít dúfa með bréf bundið um fótinn flýgur inn um gluggann hans – og ansi svekktur þegar hún hverfur út í nóttina aftur. Eftir þetta gerist ýmislegt furðulegt í lífi Antons og Pandóru, bestu vinkonu hans. Hér kynnir Þorgrímur Þráinsson tvær óvenjulegar persónur til sögunnar í heillandi frásögn sem kallast á við verðlaunasöguna Ertu Guð, afi?
Gerill
Arngrím Sævar Eggertsson dreymir um að verða rokkstjarna. Vopnaður tveimur Marshall-mögnurum, Fender Stratocaster frá 1976 og innistæðulausu sjálfstrausti leggur hann af stað og hamingjan hjálpi þeim sem standa í vegi fyrir honum og hljómsveitinni. Allavega honum. Gerill er fyrsta skáldsaga Snæbjörns Ragnarsson, sem er sjálfsagt þekktari sem meðlimur Skálmaldar og Ljótu hálfvitanna en sem rithöfundur.
Áfram Ísland
Steven Gerrard
Steven Gerrard er einn af fremstu knattspyrnumönnum sinnar kynslóðar. Hér er saga hans rakin og um leið saga Liverpool á tíma hans þar sem og enska landsliðsins. Þessa bók verða allir knattspyrnuunnendur að eignast.
Skytturnar þrjár
Lionel Messi, sóknarsnillingur Barcelona, er viðurkenndur einn besti fótboltamaður allra tíma. Þegar hinn upprennandi Neymar frá Brasilíu kom til liðs við Messi leist andstæðingunum ekki á blikuna og þegar hinn litríki Luis Suárez bættist í hópinn var ljóst að til var orðin grimmasta sóknarlína sögunnar.
Stelpurnar okkar
Íslenska kvennalandsliðið í fótbolta hefur náð frábærum árangri. Þátttakan í lokakeppnum EM 2009 og 2013 eru hápunktar í fótboltasögu Íslands. Í þessari bók er farið yfir sögu landsliðsins í máli og myndum. Margrét Lára, Guðbjörg, Dagný, Sara Björk, Katrín og allar hinar.
Dagbók Kidda klaufa 7 - Besta ballið
Ástin svífur um loftið – er það eitthvað fyrir Kidda klaufa ? Árshátíð skólans, aðalball ársins, er að bresta á, en Kiddi Kiddi hefur engan til að fara með á ballið. Ýmislegt óvænt kemur fyrir Kidda þessa síðustu daga fyrir ball ársins og meira að segja kemur upp sá möguleiki að stelpa fari með honum. En það sannast á Kidda að það er aldrei gott að fagna of snemma.
Jólasyrpa 2015
Jólasnjór þekur Andabæ og íbúarnir eru fullir tilhlökkunar! Andrés Önd fer í skíðaferð ásamt frændum sínum og lendir í klóm óþokka, jólasveininum er rænt af leikfangaframleiðanda og njósnarar Jóakims koma honum til bjargar. Skemmtileg lesning sem kemur öllum í hátíðarskap!
Gjafmilda tréð
Hjartnæm dæmisaga um gjafmildi og ást fyrir börn á öllum aldri. Einstaklega fallega skrifuð og myndskreytt bók sem farið hefur sigurför um heiminn.
Höfundur: Shel Silverstein.
Fólkið sem hvarf
Getur vináttan sigrað allt? Sól og Úlfur. Arel og Enó. Í sameiningu hafa þau ákveðið að það verði að stöðva stríðið sem er yfirvofandi. En hvernig fá þau fullorðna fólkið til að hlusta? Fólkið sem hvarf er fjórða bókin í verðlaunabókaflokknum um Seiðfólkið eftir Jo Salmson,
Kafteinn Ofurbrók og endurkoma túrbó 2000 klósettsins
Túrbó 2000 klósettið snýr aftur – og gráðuga gímaldið (sem sporðrennir jafnan öllu sem fyrir því verður) þyrstir nú í ærlega HEFND! Sem betur fer hvílir framtíð mannkynsins í öruggum höndum Georgs og Haraldar og hins óþolandi Sófusar sénís. Mun brókaraflið fara með sigur af hólmi? Eða verður Kafteini Ofurbrók sturtað niður í eitt skipti fyrir öll? Bjarni Guðmarsson þýddi. FRÁBÆRT FLETTIBÍÓ FYLGIR! Með nýjustu myndasögutækni getið þið gert myndirnar sprell-lifandi!
Seiðfólkið 4: Fólkið sem hvarf
Fólkið sem hvarf er fjórða bókin í bókaflokknum um Seiðfólkið. Höfundar bókanna, Jo Salmson og Natalia Batista, hlutu Norrænu barnabókaverðlaunin fyrir bókaflokkinn.
Minecraft 3: Bardagahandbók
Bardagahandbókin er eitt mikilvægasta vopnið í tölvuleiknum Minecraft. Í henni er farið yfir hvernig má verjast árásum illra skrímsla og óþokkabrögðum samspilaranna – það mun koma sér vel! Lærðu að byggja varnarvirki, búa til herklæði og stórhættuleg vopn, leggja lúmskar gildrur, berjast við óvini í návígi og gera árásir úr fjarlægð. Heimsþekktir spilarar gefa gagnleg ráð um bardagatækni. Þú verður Minecraft-vígameistari að lestrinum loknum!
Minecraft 4: Byggingarhandbók
Minecraft má byggja hvað sem er – möguleikarnir eru endalausir og ímyndunaraflið ræður för. Eina vandamálið er hvar á að byrja, en í bókinni eru gefin góð ráð og nákvæmar leiðbeiningar. Hvort sem ætlunin er að byggja glæsivillu með stórkostlegum garði, sjóræningjaskip með þanin segl eða ævintýralegan rússíbana af áður óþekktri stærð, þá munt þú eftir lestur bókarinnar hafa lært ýmsar brellur og öðlast það öryggi sem þarf til að útfæra hugmyndirnar. Byrjaðu að byggja!