Við viljum byrja á því að óska ykkur gleðilegs sumars og þakka fyrir veturinn! Það er farið að síga á seinni hlutann á þessu skólaári og margt um að vera á næstunni. Þessa vikuna er mannréttindavika og í dag fór fram góðgerðarhlaup UNICEF.

Skólaslitin verða föstudaginn 3. júní, þau verða hér í skólanum fyrir 1.-9. bekk og 10. bekkur verður útskrifaður Glerárkirkju eins og við höfum gert. Við sendum nánara skipulag út þegar það liggur fyrir.

Við erum byrjuð að skipuleggja næsta skólaár og liggur nokkurn veginn fyrir hverjir verða umsjónarkennarar í árgöngunum. Það er þó ekki alveg ljóst í öllum árgöngum og munum við senda út niðurröðun umsjónarkennara um leið og þetta verður tilbúið hjá okkur. Nokkrar breytingar verða á starfsmannahópnum á næsta skólaári en það skýrist betur þegar líða fer á mánuðinn þar sem auglýsingar eru á vef Akureyrarbæjar.

Þeim sem hjóla í skólann fjölgar hratt þessa dagana og við hvetjum alla til að draga úr akstri einkabílsins þegar orðið er snjólaust og bjart. Við viljum ítreka það að allir nemendur á grunnskólaaldri eiga að nota hjálma.

Við vonum að allir séu klárir fyrir lokasprettinn á þessu skólaári.

Bestu kveðjur úr skólanum!

Ólöf, Malli og Helga

Í dag var góðgerðarhlaup UNICEF í Síðuskóla. Með því að smella á fyrirsögn fréttarinnar má fá nánari upplýsingar, en einnig smella á tengil sem inniheldur myndir. UNICEF - hlaupið er fræðslu- og fjáröflunarverkefni þar sem íslenskum börnum gefst tækifæri á að fræðast um aðstæður jafnaldra sinna víða um heim og með hollri hreyfingu safna fé fyrir starfi í þágu barna í fátækari ríkjum heims. Hér má sjá myndir frá deginum.

Á föstudaginn voru veittar viðurkenningar fræðsluráðs en skv. skólastefnu Akureyrarbæjar skal árlega veita þeim einstaklingum eða stofnunum sem skarað hafa fram úr í skólastarfi viðurkenningar. Að þessu sinni fengu tveir starfsmenn skólans viðurkenningu fyrir störf sín við skólann en það voru þær Helga Lyngdal deildarstjóri og Sigrún Helga Snæbjörnsdóttir sérkennari, sem hefur sinnt kennslu nemenda sem eru með íslensku með annað tungumál (ÍSAT) í vetur. Myndin sem fylgir fréttinni var tekin við þetta tækifæri. Við óskum þeim innilega til hamingju með viðurkenningarnar.

• Nemandi sem kemur hjólandi í skólann gerir það á ábyrgð foreldra/forráðamanna sem meta færni barnsins og aðstæður á hjólaleiðinni. Skv. 44. grein umferðarlaga mega börn yngri en níu ára ekki hjóla á akbraut án leiðsagnar og eftirlits aðila sem hefur náð 15 ára aldri. Þar af leiðandi getur skólinn ekki mælt með að þeir nemendur komi á hjóli í skólann nema í fylgd fullorðinna.
• Samkvæmt umferðarlögum er börnum yngri en 16 ára skylt að nota reiðhjólahjálm.

Ákvörðun er foreldra og á ábyrgð þeirra.

2.-6. maí

Mannréttindavika

3. maí

Geðlestin heimsækir 8.-10. bekk

4. maí

Síðuskóli tekur þátt í Skólahreysti í íþróttahöllinni kl. 20, bein útsending á RÚV

5. maí

Fiðringur á Norðurlandi í Hofi, hæfileikakeppni grunnskólanna þar sem 8. 9. og 10. bekkingar taka þátt

23.-25. maí

Skólaferðalag hjá 10. bekk

26. maí

Uppstigningardagur - lögbundinn frídagur

27. maí

Skipulagsdagur, opið í Frístund

30. maí

Fundur í skólaráði