Það hefur verið heldur rólegt yfir nýskráningum og viðurkenningum síðasta mánuðinn. Þau sem hafa komið ný inn frá síðasta fréttabréfi eru:

• Félagsmiðstöðin 111
• Frístundaheimilið Bakkasel
• Heimaþjónusta og heimahjúkrun, Vesturbyggð.
• Félagsmiðstöðin Bakkinn
• Félagsmiðstöðin Fellið
• Sjóminjasafnið og fjölskyldumiðstöðin Gerðubergi eru svo að endurnýja skráningar sínar og taka upp þráðinn á ný.

Frístundaheimilið Halastjarnan fékk viðurkenningu fyrir skref 1 og Hitt húsið kláraði öll skrefin fjögur og fékk viðurkenningu sína nú í febrúar. Myndir hér fyrir neðan.

Það var kominn tími á þetta. Grænu skrefin hafa aftur verið uppfærð og endurskrifuð - síðast var það gert 2019. Breytingarnar gerast ört í þjóðfélaginu og við verðum að fylgja með. Það var þó ekki algjör stefnubreyting eða umsnúningur á aðgerðalista grænu skrefanna, en það voru nokkrar aðgerðir teknar út og aðrar settar inn í staðinn. Í heildina styttist aðgerðalistinn og nú eru í fyrsta skrefi 33 aðgerðir í stað 38 áður, í skrefi tvö eru nú 32 aðgerðir en voru 36 áður. Í þriðja skrefi fækkar aðgerðunum úr 30 í 23 og í því fjórða fækkar aðgerðunum um þrjár.

Nýtt vinnuskjal verður sett í staðinn fyrir það gamla í lok mars. Þangað til vinna allir með það sem er í gangi núna og þegar það nýja kemur munu þeir starfsstaðir sem eru komnir langt með eitthvað skref einfaldlega halda áfram að vinna með eldra skjalið, en þeir starfsstaðir sem ekki eru komnir af stað munu byrja að nota nýja skjalið (hvort sem þeir eru að byrja á fyrsta skrefi, öðru, þriðja eða fjórða).

Plaggötin verða uppfærð í samræmi við nýjan texta en þau verða líklega ekki tilbúin fyrr en í apríl. Einnig verða búnir til nokkrir nýir límmiðar. Það verður spennandi að kynna þá, en þeir verða kynntir í næsta fréttabréfi.