Fréttabréf
Ágúst 2021
Kæru foreldrar og forráðamenn
Þá er skólinn kominn í gang og óskandi að hann geti starfað með sem eðlilegustum hætti í vetur. Eins og staðan er núna þá er grímuskylda fyrir alla utanaðkomandi fullorðna og ekki unnt að boða marga inn í skólann á sama tíma. Vonandi verður hægt að verja skólann með þessum hætti þannig að nemendur geti notið eins ótakmarkaðs skólastarfs og hægt er.
Fyrstu skóladagarnir einkennast gjarnan af hópefli, vinnu við bekkjarsáttmála og útiveru. Þá er nauðsynlegt að rifja upp skólareglur, umferðarreglur og reglur sem gilda á skólalóðinni á skólatíma. Við þurfum að gera nemendum ljóst að reglur eru settar til þess að auka öryggi allra.
Við skólabyrjun er úthlutað námsgögnum. Við viljum fara vel með gögnin og nýta þau á ábyrgan hátt. Það að útvega nemendum námsgögn stuðlar að jöfnuði, sparnaði og jákvæðum umhverfisáhrifum. Með fræðslu og aukinni meðvitund um umhverfið ættum við í sameiningu, skólinn, foreldrar og nemendur að geta náð árangri í að nýta gögnin vel.
Með ósk um gott skólaár, starfsfólk Brekkuskóla
Hjól, hlaupahjól og hjálmar!
Vinsældir vélknúinna hlaupahjóla hefur aukist að undanförnu og sjáum við það greinilega í skólanum. Það er mikilvægt að minna á hjálmaskylduna og að þessum farartækjum má ekki aka á akbraut. Á vef Samgöngustofu má finna upplýsingar um notkun rafmagnshlaupahjóla.
Við bendum á að á skólatíma má ekki hjóla á skólalóðinni.
Gott að hafa í huga:
# Hjálpum börnunum að velja öruggustu leiðina í skólann og kennum þeim að fara yfir götur, með og án ljósastýringar.
# Notum hjólreiðahjálm, bæði börn og fullorðnir.
# Tökum tillit til annarra vegfarenda, sérstaklega í nánd við skóla.
Á döfinni
- Útivistardagur 7. september. Nánari upplýsingar koma frá umsjónarkennurum.
- Nemendur koma á sal næstu daga og farið verður yfir skólastarfið framundan.
Lesferill - lesfimi
Brekkuskóli leggur fyrir lesfimipróf frá Menntamálastofnun í öllum árgöngum þrisvar á hverjum vetri. Prófin eru hluti af Lesferli sem er ætlað að meta grunnþætti læsis: hljóðkerfisvitund, lesfimi, lesskilning, ritun, orðaforða og málskilning. Fyrsta fyrirlögn er í september, önnur í janúar og þriðja í maí.
Það er því um að gera að setja sig í stellingar og byrja að æfa lesturinn:-)
Uppeldi til ábyrgðar
Nemendur læra:
Að setja sér markmið, gera uppbyggingaráætlanir, stunda sjálfsrannsókn
Að rækta og efla sinn innri áhuga
Að bera ábyrgð á eigin námi
Að læra leiðir til að hafa stjórn á eigin hegðun
Aðferðir við lausn ágreiningsefna
Að sinna þörfum sínum af ábyrgð gagnvart sjálfum sér og öðrum.(Minni freisting að taka vonbrigði sín út á öðrum eða leggja aðra í einelti)
Að mynda tengsl við aðra
Að bera ábyrgð á eigin mistökum, leiðrétta þau og bæta fyrir þau
Að verða þeir sjálfir - þær manneskjur sem þeir vilja vera.
Að gera bekkjarsáttmála
Hafðu samband
Email: brekkuskoli@brekkuskoli.is
Website: brekkuskoli.is
Location: v. Skólastíg
Phone: +354 462 2525
Facebook: https://www.facebook.com/brekkuskoli.is/