Fréttabréf aprílmánaðar er seint á ferðinni, en undirbúningur og framkvæmd Vorskemmtunar tók mest allan tíma nemenda og starfsfólks síðustu dagana og vikurnar fyrir páskafrí. Kærar þakkir fyrir frábæra mætingu á sýningarnar, sem að okkar mati heppnuðust prýðilega. Vonandi höfðuð þið gaman af og áttuð góða stund hjá okkur, það var frábært að geta tekið á móti gestum á Vorskemmtun í fyrsta sinn síðan 2019!

Marsmánuður var annars býsna strembinn að mörgu leyti. Mánuðurinn hófst á vetrarfríi þar sem nemendur og starfsfólk voru rétt um það bil að stíga upp úr miklu Covid-fári, og honum lauk með miklum flensufaraldri, en þegar mest lét var 31 nemandi af 50 fjarverandi vegna veikinda. Í mánuðinum varð einnig alvarlegt slys í sveitarfélaginu sem snerti marga. Hugur okkar er hjá þeim slösuðu og aðstandendum þeirra og sendum við hlýja strauma til allra þeirra sem eiga um sárt að binda.

Páskafrí er annars hafið hjá nemendum og starfsfólki eftir mikla törn í tengslum við Vorskemmtun. Skóli hefst aftur hjá nemendum að loknu páskafríi miðvikudaginn 20. apríl. Ég vona að þið eigið góðar samverustundir yfir páskana og að nemendur og starfsfólk komi endurnært til baka, tilbúið í síðustu lotuna á þessu skólaári. Gleðilega páska!

Með kveðju úr skólanum,

Þorgeir Rúnar Finnsson

skólastjóri Grenivíkurskóla

Inga Rakel og Sigríður Diljá fylgdu hópnum og útbjuggu þetta skemmtilega myndband úr ferðinni.

Dagatal Velvirk ber að þessu sinni yfirskriftina Aktíf í apríl. Á dagatalinu má finna ýmsar tillögur sem eru í anda þess sem rannsóknir hafa sýnt að geti hjálpað fólki að lifa hamingjuríkara lífi svo sem að gefa af sér, tengjast öðrum, finna tilgang, leika sér og njóta augnabliksins.

Smellið hér til að sjá útprentanlegt pdf-skjal með dagatalinu.

Grænfánaverkefnið á Íslandi fagnar 20 ára afmæli á þessu skólaári og í tilefni þess hefur Landvernd útbúið mánaðarlega afmælispakka sem samanstanda af fræðsluefni og verkefni sem tileinkað er ákveðnu viðfangsefni. Við munum nota þetta efni hér í skólanum og leyfum því einnig að fylgja með í fréttabréfunum okkar svo áhugasamir geti kynnt sér málið.

Afmælispakki apríl fjallar um hnattrænt jafnrétti og honum fylgja fróðlegar upplýsingar og skemmtileg verkefni.

Smellið hér til að opna afmælispakkann